បន្ទាយមានជ័យ៖ នាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានលើកឡើងថាការបាត់បង់ព្រៃឈើគឺដោយសារតែតម្រូវរបស់ប្រជាពលរដ្ឋក្នុងការប្រើប្រាស់ដីធ្លាដែលរដ្ឋត្រូវកាត់ដីចេញពីគម្របព្រៃឈើជូន។ សម្ដេចថាកំណើនប្រជាជនគឺជាកត្តានៃថយចុះនៃដីព្រៃកម្ពុជាមិនដូចជាការលើកឡើងរបស់មនុស្សមួយចំនួននោះទេ។

ថ្លែងក្នុងទិវាមច្ឆាជាតិ នៅខេត្តបន្ទាយមានជ័យ នៅព្រឹកថ្ងៃសុក្រ ទី១ ខែកក្កដា ឆ្នាំ២០២២នេះ សម្ដេចតេជោ ហ៊ុន សែន ឱ្យដឹងថាក្នុងមួយ១ឆ្នាំៗសម្ដេចត្រូវកាត់ដីចេញពីគម្របព្រៃឈើដើម្បីចែកជូនប្រជាពលរដ្ឋដើម្បីធ្វើស្រែចម្ការ និងដាំដំណាំកសិឧស្សាហកម្មផ្សេងៗ។

សម្ដេចបញ្ជាក់ថាដីមិនបានបាត់ទៅណានោះទេតែត្រូវបានកែច្នៃឱ្យចេញជាប្រយោជន៍សម្រាប់ប្រជាជន។ សម្ដេចប្រាប់ឱ្យអ្នកតិទៀនសម្ដេចរឿងបាត់បង់ព្រៃឈើបើចិត្តសឿងប្រគល់ដីដែលពួកគេមានមកឱ្យរដ្ឋវិញដើម្បីឱ្យរដ្ឋដាំដើមឈើឡើងវិញ។

សម្ដេចថា៖ «ដីដែលអ្នកឯងកំពុងបង្កបង្កើនផលនោះហើយដែលបានពីការបាត់បង់ព្រៃឈើនោះ»៕

^{PHOTO: ហ៊ុន យុទ្ធគុណ}